呢幾日嘅牙痛，只能夠用一邊食嘢，令到我明白，牙真係好重要。唔知今晚睇完牙點，到底要幾耐先可以食返嘢呢？都係今朝有酒今朝醉，食返個大滿足肉鬆包先。

4點半喺公司用咗牙線同刷咗牙先，收工之後一支箭「標」走，搭9前已經到咗診所。之前個姑娘話突然有個 time slot，但我去到居然仲要等，似乎係個阿伯。聽到佢同醫生嘅對話，大意係佢隻牙最好就剝，但佢2個星期之後要去旅行、搭飛機，驚到時發炎之類。我完全明白阿伯嘅心情，因為我擔心嘅就係呢樣嘢。個阿伯猶豫不決，於是個姑娘叫佢岀來坐住先，慢慢諗。

個醫生中間仲睇咗個似箍牙嘅女仔，終於都到我。同佢講完分別要補同要剝嘅牙，佢檢查咗一次，我照埋咗X光。原來嗰隻我想剝嘅牙已經唔係一隻牙，喺X光片入邊睇完全見唔到佢，而原來有幾隻牙都有輕微補過，但我完全唔記得。

醫生睇完X光片，就同我講左上角嗰隻智慧齒其實都蛀咗少少，要補。反而一開始我想補嗰隻，佢睇完之後就建議不如整牙套。同填充物料材質無關，以前嗰個可以支撐到係因為仲有啲牙嘅外框喺度，依家連嗰個外框都甩咗，已經冇足夠嘅支撐，就算補返之後都用唔到。

再三同醫生確認，以後只可以用右邊食嘢，佢都好肯定咁答我係。個醫生見我咁猶豫不決，就話我可以諗吓先，但我真係想今日解決成件事佢，就決定補咗隻牙先，用一排，如果最後尾真係唔掂先至整牙套。同埋我對於係咪完全食唔到嘢都幾有保留，個醫生都話個個人嘅咬合情況都唔一樣，可能我就係嗰個「天選之人」呢。我依家明白點解個阿叔猶豫，因為聽到嘅嘢同自己嘅計劃有出入，係會好忐忑不安，個腦唔係好轉到，兼且有啲徬徨。

同醫生確定完我想做嘅嘢，佢就開始整我棚牙，會補咗牙先，最後先至剝牙，因為剝牙會比較多血流出嚟，如果成個口都係血，補牙嘅時候就會好麻煩。依家諗返起補牙真係好恐怖，佢補之前要幫我清咗舊嘅金屬填充物，而隻牙嘅牙根已經暴露咗出嚟。一路請，一路開住嗰部吸機，嗰風抽到隻牙就好酸痛。佢一開始都叫我忍吓，但見我好似唔係好頂到，就話同我打麻醉針。我冇得揀，佢話如果我郁就會好危險，最後尾就分別打咗三支麻醉針。我覺得打麻醉針冇嗰啲人講到咁痛，反而係牙嗰隻酸痛更加難頂，補牙嗰陣時嘅金屬聲真係好恐怖。

剝牙反而唔係咁恐怖，佢只係喺度挑挑挑，我望一望嗰堆嘢，黑黑啡啡，只係一堆爛茶渣，估唔到佢已經變到咁。諗諗吓，佢都算係自然死亡，咁多年來我一直都冇理到佢，都只係痛過兩三次。估唔到原來已經死得咁徹底。我一開始諗住由佢，睇吓佢會唔會好似細細個啲牙咁，等下等下就會成個甩出嚟，點知等唔到嗰日。趁今次補牙，就解決埋佢。

做晒所有嘢之後，我咬住舊棉花等俾錢，真係覺得鬆一口氣。雖然最後尾嘅結果同我想像中有啲出入，但我今次算係圓滿解決咗呢件事。一早打算今晚唔食嘢，但我都問咗醫生幾時可以食返嘢，佢答我9:30左右，即係兩個半鐘之後。我左手邊補咗牙，右手邊剝左牙，其實唔食就最好，只係一晚半晚，我忍到。

搭巴士返到屋企，同E講咗我今日去咗睇牙醫同做咗嘅嘢。佢覺得我有少少hyper，我覺得可能係因為腎上腺素飆升，同埋解決咗呢件事我真係好開心。喺休息咗一陣之後，我就再去超級市場，諗住買啲蕉聽日食，因為呢2日只可以食淋嘅嘢。