話說我最近迷上左《排球少年》，有一種「臨老入漫叢」嘅感覺。

可能真係要多謝武肺一次，雖然佢搞到我幾年都冇得去旅行，但因為佢，我可以 WFH。在呢幾年斷斷續續嘅 WFH 入面，因為多左時間喺屋企，例如食完 lunch 又未開得工嘅時候，就開始左我人生睇劇嘅習慣。

一開始 subscribe Netflix 係因為想睇電影，差唔到睇晒宮﨑駿啲戲之後就開始㩒其他野來睇。睇下戲又睇下動畫，就咁過左2、3年。舊年某個長假之後，睇完《The Witcher》，就開始追返之前啲熱門動畫。一開始係睇《呪術廻戦》先嘅，一睇完，不得了，勁鍾意，開始去搵啲周邊野。我極速睇完 Season 1 之後，睇怕 Season 2 有排都未有，原本有《劇場版呪術廻戦0》嘅，但戲院冇得開，又要多謝武肺。

講返《排球少年》，由於《呪術》俾我好大信心，令我覺得「其他出名嘅動畫應該都會好好睇過喎」，於是看就開始左睇《排球少年》。又不得了，超超超超超超超級鍾意，比《呪術》更加鍾意。果期我真係好開心，一有時間就睇《排球少年》。因為佢，個「熱血青年」category 開始有新 entry，先從鍾意左佢之後，我真係做咗一啲從來冇做過嘅事。

人大左，因為經歷多左，情緒波幅愈來愈細，會覺得「好鍾意」嘅野愈來愈少。《呪術》同《排球少年》真係令到我好開心，係打左開我人生另外一個領域，又多一個嗜好，算係呢 2、3 年入面我覺得最開心既事。可以搵到一樣令你沉溺嘅野都係一種幸福。