喺張床左掙扎左一陣，9 點幾落床之後又一輪掙扎，諗緊今日 hea 喺屋企定出街好。最後係人性克服左獸性，出街。

10 點出門，去剪頭髮先。估唔到仲有人早過我，有個爸爸剪緊頭髮，我同佢個仔一齊坐張梳化度等。個小朋友真係勁乖，就咁靜靜咁坐喺度，冇扭計要玩電話，也都冇郁身郁勢扭來扭去，真係乖到有少少離譜。

等緊既時候留意到個姐姐對鞋冚左個透明膠袋，真係好聰明！

等左陣，個爸爸剪完，佢講笑咁問個仔：你剪唔剪呀？個小朋友又好乖咁應佢：唔剪。好彩佢唔剪，輪到我了。

跟住就出發去行街，原本係打算剪完頭髮之後去食早餐，但諗諗下都係去食一ｄ平時比較少食既野。去到商場，直奔 food court，唔唔，d 野食都幾吸引，最後揀左 Papper Lunch，真係好耐冇食。好大膽咁揀左加量牛肉，真係好飽，食到我懵口懵面。

依完就行街街，同喺誠品停留左一陣。返屋企之前買左海量既餸，然後某人提我，下個禮拜淨係要煮一日咋喎，我一望，真係完全唔記得左。唔緊要，我有絕招，煮晒佢，之後帶飯用！天才！

夜晚就例牌返呀媽度食飯，早左少少返到，大家一齊研究新到既壓力煲。晚餐有釀豆腐，超好味。