尋晚凌晨兩點幾先至瞓，今日差唔多11:00先起身，食完嘢就睇龍貓，真係好治癒。



下晝就做吓瑣碎嘢，將嗰啲有可能爆鈕嘅恤衫釘返粒暗鈕。原本以為件件都要釘，穿上身之後發現其實得兩三件要釘，好開心，小確幸。

跟住就執下食譜，原本想寫program砌出嚟，最後發現都係肉眼睇最快。而家好Perfect，每個禮拜都好多花款，唔重複，好有成功咁感。

今晚都係冇返阿媽度食飯，我亦都冇煮，揀完一輪最後係食咗pizza。

食完之後沖埋涼就燙衫，咁樣聽日就會冇咁忙。燙咗好多件衫，燙晒啲唔係返工嘅衫，不過其實都係得5、6件，其他嗰啲冇拎出嚟。

唔知點解今日瞓得好夠，但係11點幾就已經覺得有啲眼瞓，所以好早就入咗房，睇嚟今晚都係早啲瞓。