早餐

食完就去巴士站，因為功課做得唔夠，喺巴士站搵咗陣，好彩最後上到 9 點嗰班，要搭個幾鐘車先到

一落車，太熱啦，唔係好掂，都係搵間 cafe 歎下啡先

個打卡景點好多人

我哋真係好 hea，隊都唔想排，喺隔離影咗張佢哋同框嘅相之後就走咗

下一站係櫻井神社，落車之後仲要行差唔多半個鐘先去到，好在沿途有樹蔭

向上望的確係有神域嘅感覺

烈日當空

我哋真係唔好彩，喺韓國撞正人地三連休，來到日本又係三連休

我哋去到芥屋の大門，周圍都係人，買完船飛之後諗住食午餐，搵餐廳搵咗勁耐

有個踩單車嘅鬼佬同我哋一樣，我哋一齊入咗間餐廳，但餐廳太忙，一直都唔招呼我哋

到佢哋得閒返少少先叫我同 E 入座先，佢之後先幫我哋執台，但我哋除咗鞋上坐低一陣就收到 J msg 話另外一間餐廳有位

我同 E 雖然有少少唔好意思，但都著鞋走人，事緣我哋見入來咁耐都冇出過餐，睇怕都有排等

呢間壽司店俾咗間房我哋，坐得好舒服，凍水勁正

味道就好普通

話說我哋等緊上餐嘅時候，見到頭先嗰個鬼佬都入咗呢間餐廳，咁就啱啦，佢咁鬼佬，我哋都有少少擔心到底佢食唔食到午餐，依家就放心晒啦

我諗今日真係間間餐廳都爆，中間有個唔知台灣定香港人入來問咗句：10 people, okay？跟住個侍應話要問下大將，最後就拒絕咗佢，慘

遊船河，原來會駛入去個洞度，可以上甲板望下啲岩石，但就冇得上岸嘅

其實係幾壯觀下嘅

等緊去地鐵站嘅巴士，仲有成個鐘先有車，又坐低飲杯凍飲先

嗰程巴士勁恐怖，首先係架巴士勁細，塞滿晒人，搞到個司機要拆凳轉企位

有個男人同女人又分別挨住 2 碌柱，搞到我哋想 hold 實都要搵位攝，覺得日本人有時心地真係好差，有啲擺明就係特登咁樣做，勁自私

沿途又勁顛簸，而且唔係短途車，係嗰啲因為得一架車去地鐵站所以要兜晒所有地方嘅巴士

因為只收現金，落車時大家又要摷來摷去，搞咗勁耐先落到車

然後再搭咗成個鐘地鐵先返到博多，大家都勁攰，由頭瞓到落尾