未到 6 點就醒咗，睇咗陣世界盃

6 點幾就出門去食早餐

唔錯

再去買埋杯咖啡，我哋係嗌 to go，個店員見我哋坐低，以為佢自己聽錯，於是再三確認

我哋答佢係真係 to go，其實聽錯都冇所謂啦，但可能喺佢哋心目中係好重要嘅事，坐咗陣，拎住啲嘢飲就走人

集合地點意外地難搵，我哋要上返地面再 Google map 先搵到

有個家庭好遲先上到，仲拎住外賣早餐，可惜車上面唔俾食嘢淨係可以飲嘢

好似得我哋係香港人，其他嗰啲都係台灣人

呢個 tour 係名符其實嘅拜拜團，第一站係雷山千如寺，我同 E 講我哋去咗糸島，佢一開始唔係好信，哈哈

參拜要另外俾錢，我哋入去之後淨係欣賞咗重要文化遺産的千手觀音，冇入香油錢也都冇聽講經

五百羅漢

仲有棵超過400年的楓樹，秋天一定好靚

好日本

好日本 x 2

下一站係太宰府天滿宮，由於主殿修葺緊，所以冇乜好睇，兜咗個圈就完

午餐，見到一蘭，但排隊要 2 定 3 個鐘，我一開始仲以為自己聽錯，隔離個香港人話冇聽錯，真係要咁耐，於是就益咗隔離間烏冬店

味道不過不失

食完又行完街，我哋就去小島咖啡度 hea

返返去停車場時發現架旅遊巴唔見咗，我哋勁驚訝，一開始我仲覺得只係我哋認唔到架巴士又或者係個司機一時行開去食嘢

但 E 同 J 就話冇可能，一定係走咗，我唔死心，兜咁 2 圈，真係冇

E 一度想返返去博多，但我哋又覺得既然包埋柳川嘅船飛，去埋啦，於是我哋搭鐵趕過去

去到柳川正當我哋諗住行過去嘅時候，見到居然有接駁小巴，都啱嘅，咁熱，真係唔係個個都行到

我哋俾咗 QR code 佢睇，但佢又冇掃，直接俾我哋上車

跟住神奇嘅事發生啦，遊船河個職員英文好好，掃完個 QR code 之後，我哋同佢解釋我哋本身係跟 fun bus 一齊來嘅，但我哋 miss 咗架車，所以自己過來

佢居然明白我哋講乜，仲同我哋講架巴士未到，到架巴士來到嘅時候，佢又幫我哋用日文同個司機解釋我哋嘅情況

今次一定要影低個上車時間

搭船嘅地方

經過橋底

個船伕真係好俾心機，全程都唱啲大家都有可能識唱嘅歌，例如多啦 A 夢等等

有首係 Amazing Grace，啲台灣人有唱普通話版，但我淨係記得學校教嘅英文版，所以就唱英文版，仲要唱低音，意外地和諧

去到某啲地方個船伕又會叫我哋影相，大家都係好欣賞佢嘅專業精神，係咁拍手

最後返返去博多，我哋自己傾返呢件事都覺得有啲低能，中間有問同車嘅人，原來太宰府嘅集合時間係早一個鐘

啲台灣人可能覺得我哋好奇怪，3 個後生仔女，又唔熱衷拜拜，又識得自己搭鐵過來，點解仲要 join 呢個 tour 呢

其實真係，我哋都覺得以後都係唔 join tour 好啲，自由好多，好似今日世界盃總決賽，可以睇完休息一陣先出門，唔使咁趕

行咗陣書店

差唔多 8 點好多舖頭都準備閂門，我哋去咗仲開緊嘅 DAISO 大肆購物，真係買咗勁多嘢

DAISO 好多台灣人同香港人，自助付款機係咁傳出嘟嘟嘟嘟嘅聲，係資本嘅聲音呀

熱門嘅拉麵店好多人，我哋揀咗間有位嘅，味道普通

DAISO 買嘅零食，意外地好食

今日真係熱到 hi hi