尋晚瞓覺之前，個口都仲係好酸軟，雖然最後尾順利瞓着咗，但總係覺得成晚瞓吓醒吓瞓吓醒吓。今朝8:00已經起咗身，琴晚唔可以刷牙，成個口漿住晒，好唔舒服。個姑娘話唔可以吐口水，我又唔想刷牙住，所以只可以不停咁樣飲水，清一清個口。

屋企可以食嘅嘢唔係好多，早餐就食咗香蕉同埋乳酪，但完全冇糖，得酸嘅嘢真係麻麻地。到中午我見隻牙已經冇咁酸，好似可以食返啲正常嘅，摷一摷櫥櫃同雪櫃，又真係可以搵到啲食得嘅嘢，即食越南牛河。唔想刺激到個傷口，我連嗰包辣椒醬都冇放，仲要焗到佢淋一淋。太熱食又唔得，焗完之後擺喺度一陣先至開餐。應該有24個鐘冇食咸嘅嘢，覺得真係好好食，唔係誇張，人間美味。

今日冇飲過咖啡，食完嘢之後昏昏欲睡，加上個頭赤下赤下咁痛。我覺得係因為琴日嘅麻醉藥，最後尾頂唔順， 2點左右去咗瞓晏覺。瞓到五點幾就醒咗，真係舒服咗好多，雖然個頭都仲係有少少痛，但已經舒緩咗好多。休息真係天下無敵。

夜晚返阿媽度食飯，估唔到可以正常食嘢。原先以為只可以食魚，點知連菜同埋雞都食到，木耳亦都係，但係我就唔敢挑戰冬菇，佢望落去似係好爽咁。「妹」下「妹」下咁樣又食到件cake同埋榴槤，唔錯唔錯。

夜晚返到屋企又肚餓，食埋個菠蘿包先，可以食得返嘢，真係好幸福。

我有照鏡望吓補咗嘅牙同剝咗牙嗰個位係點樣，跟住發現居然有粒痱滋，我覺得係嗰日個牙醫整親嘅 _(:_」∠)_。

今晚終於可以拆返牙，唔敢用電動牙刷，用普通牙刷好溫柔咁清潔，爽晒舒服晒。