離開有田，出發去伊万里大村內山

冇乜返工嘅人，反而有唔少學生，月台有不同世代柿右衛門嘅作品，幾乎全部都係花

架車好有年代感

好多都係無人站

又嚇左一跳，用晒ｄ一千円同銀仔得返萬円，唯有去售賣機買ｄ野唱散佢

點知有２部機都唔食新紙，唔通要揹住佢去大川內山？咁大獲？！好彩行出車站仲有部機係食既，嚇死寶寶了

車站附近得一間餐廳有早餐食，就佢啦

估唔到我都有同當地人傾偈既一日，仲要係憑我識嗰幾句日文

以前我以為香港係一個岀名嘅地方，大家都吹到好大，話咩「東方之珠」，「紐倫港」之類

2019/20開始明白，根本我哋就係豆腐膶咁細嘅地方，喺世界上冇乜影響力，但至少喺亞洲點都有啲知名度，點知……

咖啡店入面有４個老人家，２男２女，其中一男一女似係老細，另外果一男一女就係客人，熟客，感覺上每日都會來呢度坐一坐嗰款

佢地對於我呢個旅客好似都有少少興趣，知道我係一個人來旅行就更加驚訝，問我係邊度來，我答香港啦，跟住個男主人問係咪「某某隔離果個地方」，但佢又講極都講唔到「新加坡」喎

到個男客人道出新加坡之後，我先知佢想問ｄ乜，但都係錯既，個男客人再次幫我答左，果度係馬拉

我以為香港唔重要所以先冇人知，但如果佢地連呢排係威係勢既新加坡都唔知既話，咁又似乎唔係我地問題喎

早餐食西多感覺好似好 heavy，但事實上味道好普通，食落就係有蛋味既厚方包

架巴士係 point 2 point，得起點同終點，但都拎張飛先

又見到佢，影張全景先

靚

希望有一日可以去晒呢ｄ地方

古時在日朝鮮工匠既墓

有種世外桃源嘅感覺

有好多鋪，我幾乎間間都有入去望下睇下有冇心水嘅杯

一直向上行

好涼，果然係大樹好遮蔭

登山口，睇落唔係易行嘅山

睇旅遊地圖，應該兜個圈會去到另外一邊

但行極都見唔到落山條路，開地圖一睇（好彩有 signal），完全離開咗大川內山，拿拿臨行返轉頭

好熱好肚餓，決定食咗午餐先

開始食咗一陣，突然間停電，大家都好驚訝，啲店員都係，但睇佢哋啲反應又唔似第一次

食完抖完涼返就繼續行鋪頭同參觀資料館

行晒所有鋪，最後都買到杯！好嘢！雖然都係比理想中細隻，但鍾意佢個櫻花圖案

距離下一班巴士仲有啲時間，周圍行下先

返返去伊萬里買埋去福崗嘅長途巴士券

架巴士會途經鏡山下，覺得好神奇，年前行過上鏡山睇風景，上次都係搭巴士岀福崗，同一個落車站——日銀前

落咗車喺去酒店嘅途中見到成日喺 YouTube 見到嘅屋台

吸取咗上次高雄嘅教訓，一到酒店，洗衫先，平過出面洗衣店

然後岀去買晚餐，喺超級市場買咗壽司同甜品，跟住仲喺洗手房買咗零食，有啲癲

有個小插曲，我入左錢但佢又卡住左，於是我落櫃台搵人幫手，因為部機唔係佢地，所以佢地唔可以打開俾我

跟住俾左 100 円我，由於我太想食，所以就用左果 100 円再扭，結果就跌左２包出來

正當我開開心心影晒相，諗住同人分享時，個職員居然打電話上來問我係咪再扭，話要拎返包零食

但我已經換晒衫，就問佢可唔可以聽日出街先拎俾佢，佢地就話會上來拎，最後就係俾返一包佢地

我真係覺得好莫名其妙，唔知係咪文化差異，都唔知香港同其他地方既酒店會唔會咁