話說我最近喺度睇緊本《做自己的生命設計師》，只係睇左第一章，心裡面略略為自己依家既狀態評分。好明顯，我係缺乏「玩樂」，可能因為年紀大左，見既野多左，好多野都冇乜驚喜，但呢件事又突然打破左ｄ野。

年紀大自不然就會注意健康，自從知道糖係一樣不宜多吃既野之後就好多野都少糖又或者係走甜。前一排有一日突然間好想食朱古力，lunch time 就落左樓下間百佳買，明明係想食薄荷朱古力既，一望，嘩，100G 入面超過一半係糖，仲要個個牌子都係咁。但諗諗下又覺得岩既，呢個世界邊有人鍾意食苦既牙膏架。其實唔止呢款，所有牛奶朱古力都係咁多糖，咁就唯有揀純可可既朱古力啦，仲要揀一款最少糖既。但佢就完全安慰唔到我，含住一舊咁苦既野，心情一ｄ都唔雀躍，反而係令到我唔再想食朱古力。如是者，包朱古力就放左喺櫃桶，真係好間唔中先食一舊仔，因為實在唔太好食。

直至去完歐洲，食過漢莎派既朱古力，覺得好好好食，唔係因為佢係 Lindt，而係因為佢係牛奶朱古力，我相信其他牌子都一樣咁好食。返工時，開櫃桶見到包黑朱古力，心諗，難食都要食架，不如把心一橫，快ｄ食晒佢，下次再想食朱古力既就買牛奶朱古力啦。於是我一放落口就唔含啦，直接咬，跟住我發現，原來咁樣咬碎其實係幾好食。因為佢夠硬，成舊野係脆脆地，可可幾香口，苦苦地得來又滲少少甜味，咦，原來呢個先至係食黑朱古力既正確方法？！

好無謂既開心大發現，對世界完全係冇貢獻，但就令到我既人生得到小小既樂趣，本身以為好難食既野原來救得返，呢下真係好開心。

我唔知呢ｄ係咪就係書中講既「玩樂」，無論如何下次一定會買超多糖既薄荷朱古力，人生苦短，甜一甜令自己開心下先最重要。