由於尋日食咗勁難食嘅自備午餐，難受咗⼀個下晝，今日⼀定要食返啲好少少嘅嘢先。

前幾日去搭巴士時見到有間外賣自取 8 折，去到先知原來係日本嘢，但我今日想食重口味炸嘢。隔離間台灣嘢 FoodPanda 有 8 折，所以就算去到門口都經平台落柯打。

要等 10 分鐘，去萬寧睇下敏感藥有冇減價先，居然冇。返到餐廳，仲未有得拎，再等多10分鐘先有。

外脆內軟同熱，但唔知係咪因為要就返香港人口味，好淡。我今日係想食重口味，點知咁淡，有啲失望。滷肉飯唔錯，雖然加粟米係好九唔搭八，都係淡仲個飯勝在有豬油包住，好味。原來個飯係勁大份，我係好勉強先食得晒。

呢個得澱粉同肉嘅午餐好催眠，食完勁眼瞓🥱。