本來打算收工之後去行始創 warehouse 旗艦店，但收到 msg，我啲《排球少年》到咗啦！

睇返佢嘅辦公時間，居然只得一至五！咁今日一定要去拎，如果星期六日都可以睇戲或行街順便拎，於是收工之後就過咗觀塘。

之前睇地址已經覺得有啲怪，喺 APM？！啲咁高檔嘅地方！以為係啲劏房 office，一入到去，嘩！真係高級劏房，居然有 reception！仲要係 3 個！唔似可以就咁入去自己搵嘅感覺。

我：「15xx?」

Reception:「係。」

我：「呃，想問點去？」

Reception（黑人問號）:「呢度就係啦」

我：「⋯⋯」

我：「攞嘢嘅唔該」

我一直以為係普通爛鬼 online store，估唔到係有返咁上下嘅公司，岀面又只係寫住「15xx-15xx」，冇寫公司名，所以我先以為係啲 share office。

驗完貨再行咗陣就去食嘢。其實我真係唔肚餓，但一諗到轉頭會勁多人就煩。同埋有天婦羅，即炸野菜好好食，但食到好濟。食到尾聲，居然有隻小強，又未至於好驚嘅，係擔心佢跟我返屋企啫，加上我已經食唔落，急急腳走人。

再行多陣，都仲係好飽同好早，不如照原定計去 CD warehouse，如是者，我就去咗太子。雖然話係𣄃艦店，其實都好細，一眼望晒，始終 CD 都係式微緊。估唔到冇乜 RubberBand，網上見到嗰張售罄嘅 EVA，分店也都冇。但居然有啲勁冷門嘅嘢，《異獸魔都》嘅 OST，不過都有可能係因為冇人買所以仲有貨 ( ･᷄ὢ･᷅ )。

極速行完，由於仲係好飽，所以打算行去深水埗搭巴士。但行行下，見到個巴士站，又咁啱有架車埋站，真係機會難得，梗係上車返屋企啦。