8 點半左右就醒咗，瞓咗 6 個鐘左右，都 okay 嘅

食完早餐，hea 下又做下家務，中午左右岀門採購

第一個任務係幫 E 買洗畫筆嘅工具，估唔到斷貨，明明之前成日都見到佢，到要嘅時候又會冇嘅，真係好神奇

跟住去日本城買紫羅蘭泥，估唔到真係有

去吉之島行下服裝部，買咗袜，最後去埋超級市場就返屋企

返到去執下嘢 2 點半左右又未肚餓，決定去一轉超級市場，冇錯，1 日去 2 轉超級市場 ( ･᷄ὢ･᷅ )

估唔到可以買到 3 百幾蚊嘢，我仲以為要計算睇下用唔用到張 coupon 添，點知輕鬆解決，最後就係買埋麵包

返到屋企先焗麵包食咗先，然後又係執嘢、燙衫再執嘢

5 點半都未到又開始準備晚餐同聽日帶飯嘅嘢，食完洗完碗，再煎年糕食，再洗碗 😂，發現今日啲嘢真係重重複複

是日終極任務就係幫紫羅蘭換盆，朝早發現自己分株嗰棵啲根冇乜點生到，唔知係咪因為啲泥太實，希望換咗之後會好啲

到夜晚 9 點終於都沖埋涼可以 hea，10 點過少少就入房，碌咗陣電話，11 點之前已經熄燈瞓覺