早餐係 E 同 J 都想要一再 encore 嘅豬肉湯飯，呢間的確係好味嘅

最神奇嘅係，個老闆居然係一個識得笑嘅男人，同埋佢係我哋成個旅程入面服務態度最好嘅人

我哋都係第一次見到笑到露出牙號韓國人，好難得

間餐廳就喺傳統市場入面，我哋食完出去時，舖頭隻貓居然跟住我哋一齊行，仲蹭蹭我

嘩，真係超級得意，我嗰吓真係勁開心，諗返起就覺得俾貓蹭先至係旅行要記住嘅事，前一日發生嘅嘢應該要儘快忘記

隻貓一路跟一路跟，搞到我哋有啲擔心佢會唔會愈行愈遠蕩失路唔識返去，點知行行下又唔見咗佢，再見啦

食飽就去啡一啡先，原先係想去「孫興慜咖啡」，但見人山人海，同埋原來佢嘅賣點係即溶所以又平又大杯，又好似唔係好啱我哋

於是來咗呢間望落好坐啲嘅 cafe，我哋搵咗位之後，E 同 J 就落去買

斜對面就係我哋啱啱入去睇完餐牌又出返來嘅 MEGA COFFEE，真係好多人

唔錯唔錯

今日行程第一站係甘川洞文化村，原來啲鬼佬遊客都來晒呢度

一眼望晒，就係咁，就係呢種感覺，就係你覺得嘅嗰種感覺

周圍都有貓貓嘅壁畫

仲有小王子

好曬好曬，我哋見連平時最愛陽光與海灘嘅鬼仔都頂唔到要擔遮

PEACE BE WITH YOU

極速行完個文化川，原來仲諗住行去碼頭，但原來係勁遠，都係算

原來今日係制憲紀念日，唔怪之得周圍都係國旗同人啦

跟住去咗附近嘅臨時首都紀念館

仲參觀咗釜山近現代歷史館別館因為制憲而搞嘅特別展覽

講解因為戰爭而有大量人走難到釜山，同戰後釜山嘅發展等等

呢度金庫改建的

釜山塔

離開釜山之前食埋午餐，穿過勁多人嘅傳統市場，搵到間評分唔錯嘅燒肉，好食，佢仲送咗份魚板年糕俾我哋，好彩我哋冇再嗌其他嘢食

然後，又又又遇到有笑容嘅老細，真係好難得

我哋發現態度比較好嘅老細都係識講英文嘅人，今朝嗰個老細都係咁，可能佢哋比較明白始終係做服務業，不能夠成日都黑口黑面對住人

返酒店拎完行李，我哋就 call 咗 uber 去碼頭，居然俾人搶咗架車

有個黑人一見的士就拉門上車，而個司機見到個姓都分唔到個客係咩國際，可能見到唔係韓國人就俾佢上

但我哋設定嘅目的地係去碼頭，雖然有少少擔心嗰個外國人唔知最後去咗邊，但都真係冇計，咁樣搶我哋車，幫佢唔到

仲有另外一件烏龍事，E 居然揀錯咗碼頭，上到車同個司機再三重複我哋想去嘅其實係隔離嗰個碼頭，好彩最後順利到達

攞飛同出境都比我哋想像中快，我哋仲要喺個候船大堂等咗勁耐先上船

見到啲韓國人一個二個都帶住 pizza 上船，搞到我都有少少擔心船上嘅伙食

排隊上船嘅時候聽到我哋前面嘅家庭講廣東話，好似仲有另外一組香港人，好驚訝

順利上到船，完全係日本嘅感覺

E 去拎鎖匙，J 要去霸床位，所以得我喺度看住啲行李，我見啲韓國人已經霸晒枱凳，開始食嘢吹水

靚房真係唔多

J 過來會合我之後，我哋就一齊推行李去 E 間房，都幾大吓

因為晚餐有限時，我哋唔算好肚餓都諗住食啲嘢先，踢拖真係好舒服，好鬆懈

晚餐統一價錢 1000 日圓，船上面嘅話又唔算貴喎

我同 J 都係食咖喱，E 揀咗泡菜麵，我哋仲喺自助販賣機買咗炸雞，原先係想試埋另外一款韓式炸雞，點知賣晒

canteen 有微波爐真係好方便，可以食熱嘢真係好開心，咖喱就係普通平咖喱水準，冇失望冇驚喜

食完仲行咗陣小賣部，同買咗雪糕返房食

到差唔多時間，大家都上咗去甲板度睇釜山大橋，見到有個鬼妹包住頭巾出來，哈哈

我以為自己影咗張 masterpiece，其實係鬆郁矇

睇完大橋再沖埋涼，我同 J 就上返去床位

返到去嘅時候已經熄咗燈，呢張相係 J 頭先霸位時影嘅

霸位用嘅物件，我見啲指引話要將船飛夾喺床位前面，但因為有齊個人資料我就冇放，啲人行過都會望得一清二楚

床位仲有私家燈，因為已經收唔到信號，船上也都冇 wifi，所以大部分人都準備瞓覺甚至已經瞓著咗

床頂係通窿嘅，都好嘅，冇咗壓抑

因為下晝飲咗杯咖啡，我瞓唔著，一直到凌晨點幾 2 點定 3 點呢先瞓到，SHIT！