尋晚無無聊聊碌電話嘅時候見到俾信用卡公司揀咗做特選客戶，有張買滿 $100 送 $50 嘅優惠券，但就要去屯門分店

我本身今日都要出門採購，咁就去一轉屯門啦

估唔到有斬獲，喺 GU 買咗 1 條褲 2 條裙

再去吉之島，買左啲日用品，估唔到今日再有折，唔夠 $100，去文具部兜咗個圈，又俾我搵到好嘢，係 $9.9 嘅姆明貼紙，靚得來仲要質地幾好

唔知點解搵唔到間 Living Plaze，唯有走人，今日算係滿載而歸

好熱好熱，正午真係好熱，但點都要去一轉街市

買齊嘢，諗住去埋凍肉鋪，點知落咗閘，下？！唔通又執咁？唔好掛，行近啲睇，原來係 lunch time

都啱嘅，夏天中午熱到咁，應該都冇乜人呢個時候出來買餸嘅

返到屋企，覺得有冷氣嘅地方真係天堂，衫都唔換住，飲返杯有氣凍檸茶先

涼咗少少之後之後就去沖涼，啲水好熱呀，沖到最後要轉凍水，舒服晒

休息咗陣之後就燙衫，午餐係食唔健康穀類早餐

跟住成個下晝都瘋狂做廚房嘢，整咗聽晚食嘅嘢先，高壓煲煮港式咖哩同洗咗通菜，再炒咗聽日 lunch 嘅五香肉丁炒飯，主要係要消滅之前凍肉鋪送嘅金菇

5 點半左右就開始煮晚餐，咸雞粥，但中午買錯咗嘢，我係想買豬膶，居然買咗豬腰（腎），google 咗下，雖然鐵含量差咭多，但因為有機會多重金屬，所以最後都係冇煮到

食完飯洗完碗再食綠豆沙，沖埋涼就 8 點半左右，好攰，但已經比之前啲星期日早咗做晒所有嘢

真係忙咗成日，點解星期日成日都咁多嘢做，真係好攰，我哋真係應該放 3 日假，2 日真係太少⋯⋯