早餐

話說我呢幾日岩岩睇完本《12周做完一年工作》就覺得要的起心肝辦大事，唔，首先要有計劃先。

今年本 schedule 係月計劃同埋勁細本，可以寫野既空間好少，自從我開始寫週末有咩野做既時候已經發現唔係好夠用。咁岩 10 月開始，就係各大 schedule 出爐既時間，一於趁早買返本新既大本ｄ既，記野都易ｄ。

由於依家真係少左人寫字，schedule 都冇以前咁多款揀，我去 MUJI 官網掃左掃，唔係掛，2026 年既居然售罄，真係出得咁少貨？！

於是我中午就抽左條筋，山長水遠咁行左過去太古廣場既無印，跟住發現仲有好多貨囉，即係佢係想ｄ人去鋪頭買……可能因為呢ｄ始終係季節限定既產品，賣完都唔會補倉，也都唔想嘥人力物力去上 online shop。我之前已經係咁易研究左少少，來到就揭下，發現岩我心水既真係得果本，反正都來到，買多本公司用。於是掃左２本就走人，嘩，跟住就辛苦啦，烈日當空行返轉頭。雖然我有帶遮，但真係冇乜用，一樣熱到死。

返到 office 就勁吹風扇，用左勁耐時間先 cool down，到下晝做做下野時仲覺得自己有陣臭汗味。去廁所時順便聞下，又唔係話好強烈，但我懷疑ｄ汗係流左落去然後俾ｄ衫食左，我都幾肯定陣味係自己發出來，不過應該只有我聞到，隔離ｄ人就應該聞唔到既。我覺得自己真係癲左，雖然話做就話有行動力係好事，但應該有更多好既方法，例如至少可以搭巴士過去。又或者真係等到星期五收工時順路行過去先買。完全唔明點解我果陣時要咁心急，哈哈。