早餐，BTW 假期真好 ٩(˃̶͈̀௰˂̶͈́)و

某人見到我又整包都忍唔到問，係因為想食 all day breakfast，前 2 日買咗啲 dead meat 腸，要「白」包來餸。

總體來講係成功嘅，個小缺陷係冇整走啲大氣泡，焗岀來發現真係有啲皮肉分離。

---------- =u=V ----------

因為夜晚岀街食，所以將原本今晚用嘅嘢準備好佢聽晚先用。仲有將中秋節食剩，韌到咬唔到嘅䳘拆骨帶飯用，啲油真係好香。

6 點左右就岀門，真係好難得，已經好耐冇岀去食晚餐，係食韓國嘢。間餐廳好忙，忙到我哋㩒咗幾次鐘都冇人過來，舉手都舉咗一陣先截到個人來落單。居然係韓國仔！好彩都落到單，有一味餸係星期一至四限定，我哋就落住炸雞同五花肉先。

佢哋真係好忙好忙好忙，大概過咗成個世紀，我哋終於都忍唔到捉個人問：其實有冇落到單？個侍應態度超好，say 晒 sorry，答話單就有落到嘅，但厨房爆晒厰可能仲要等多陣，仲拎咗醃蘿蔔俾我哋食住先。過咗一陣，啲嘢食終於都到咗，熱辣辣，好味。好難得全部食晒，之前仲想點多碟韓式粉絲，見佢哋咁忙就算，依家個份量反而啱啱好。

食完就去商場買衫，阿媽買完就返歸先，我哋 3 個就去食甜品。原本預 4 個人食就落咗 2 件多士甜品，依家得返 3 條友，可能要好勉強先食得晒。上菜嘅侍應見到 2 份都忍唔到驚訝地問：「2 份？！」佢可能驚我哋落錯又或者厨房整多咗，我哋半苦笑咁答返：係 2 份，原本有 4 個人食。最後就梗係食唔晒要攞走啲多士，個經驗豐富啲侍應就提我哋因為多士焗過來，驚有安全問題，原本係唔俾打包嘅，除非我哋堅持。最後我哋都係打包走，唔想太浪費，焗過嘅麵包就應該係安全嘅，危險嘅應該係上面嘅雪糕同糖漿。

食完坐咗陣就散水，我覺得要講嘅嘢喺中秋節嗰晚已經講晒。跟住大家好驚訝，「其實咪尋晚咋嘛！」咦！係喎！好神奇，感覺已經過咗好耐。