話說我最近換新手機就挑戰傳說中既出新卡賺迎新系列，因為佢講到明有名額，所以我一開始都抱住有就有冇就算既心態。但當我一步步跟住做既時候，加上今日發生左一件事，心態已經好唔同，同時有一種原來我都只係一個「瘋狂人類」既感覺。

好簡單咁比較下唔同選項，同 E 一樣，唔想將ｄ資料俾網紅，所以我最後揀左 Mox x The Club。

一開始就用 code 開左銀行戶口先，明明買機係要張 credit card，唔知點解我果陣時唔揀開埋 credit card，第一樣就已經做錯左。

跟住等佢批個銀行戶口，於是等左 3 到 4 日，等既日子咁岩撞正長假期，唔知ｄ職員去旅行定係本身都係需要咁耐，一路等就每日都望下名額滿左未。好，等到個戶口批左，The Club 積分都成功入帳，好似好順利咁。睇下開張 credit card 會唔會易ｄ，原來係唔會既，因為要審核埋糧單，於是又重複等待同 check 名額既輪迴。不過今次就快ｄ，2 到 3 日就已經批左。

好！張卡有啦，去 The Club 買機先，OMG，iPhone 17 預售居然售罄？！剩低 d 貴機，唔係我心水，果下就覺得 GG 了，甚至係覺得佢地為唔想俾咁多回贈而限制供應。可能冇望啦，但都等下啦，於是，我又每日都望下睇下佢會唔會返貨，又真係俾我等到 wor。

就喺尋晚，我見到佢有返貨，同屋企人食完飯之後就落 order，用埋 d Club 積分，都即刻減左 4 百幾， credit card 確認交易既 dialog 都㩒埋，應該可以做既都做完啦。

到左今朝，我再去 check credit card 發現冇果筆交易，再去 The Club check，oh，原來尋晚既付款係唔成功。好啦，再來一次啦，望下仲有名額，GO AGAIN，於是我重複尋晚做既所有既，都 check 左有入優惠碼，完美。

但當我冷靜落來，再 check 返單交易，發現有個致命既錯誤，我明明記得之前有個 term 係要單筆交易要 $6500 以上，而我用左積分，所以就唔過 $6500。果刻我真係好恨自己，當然仲有覺得自己蠢啦，用積分果下仲要覺得自己好醒，有就用左先，依家先發現大獲。

冷靜ｄ，睇下有咩可以做先，首先張單岩岩先開，去 app 睇下有冇得㩒取消，係冇既，跟住聯絡網上客服，問左２句，唔得。我再打去搵真人客服，問返同一個問題，佢都係答返我同一個答案，即係冇計。喺一半放棄既準備之下又試下搵銀行線上客服睇下有冇得取消啦，就冇人即刻覆既，都預左唔得架啦，不過都係咁易問下啦。

喺我做完果堆野之後，第一個感覺就係覺得自己蠢啦，第二個感覺就係自己好唔冷靜，俾之前一連串可能會冇名額既焦急所影響，而唔記得一個好重要既數字－－$6500，明明呢個數字我有留意到，也都有同 E 提過，點解最重要既時候會唔記得左呢……人性呀人性……

為左令到自己冷靜返，我決定計一計損失先，廣告入面最高既優惠係 $2100：

「第一賞：開戶＋link卡＋申請Mox信用卡，即送2,000 Club積分⁶

即日起至2025年12月31日，新客戶憑邀請碼「CLUBLINK」開立Mox戶口，於開戶當日起計30天內：

1) 將Mox Card連結至The Club帳戶（打開Mox App即可按指示輕鬆完成）；及
2) 申請Mox信用卡, 即送你2,000 Club積分， 讓你用於扣減價格，更平入手全新iPhone 系列！」

「第二賞：於The Club買夠再送HKD1,000現金獎賞

在Mox信用卡獲批核當日起計30天內於The Club或Club Travel作單次合資格消費滿HKD1,000，再賞你高達HKD1,000現金獎賞，並於交易結算後直入你戶口。 」

「第三賞：Mox x HKT大癲優惠：「全城最好」年度新機現金回贈⁷高達5%⁸＋高達2%無上限CashBack⁹

依家我就來一個中段回顧，睇下到底我有享受到幾多野先：

• 第一賞：GET，2,000 Club積分 = $400
• 第二賞：TBC，如果有就 $400 + $1000 = $1400
• 第三賞 A：mola mola，如果有就真係岩岩好係 $2100
• 第三賞 B：$6413 * 0.002 = $11.5

好啦，小結完畢，教訓已得，決定寫完篇野就塵歸塵土歸土，唔再恨自己。