今朝幫左個學生妹，開心。

話說我上左地鐵之後，發現個學生妹拎住把開左既橙色遮，閂極都閂唔到。觀察左一陣佢都仲係搞唔掂，係咁喺度 chok，隔住個口罩都 feel 到佢既尷尬同無肋。我斜對面個師奶又係咁望住佢，我以為佢會出手，點知冇。唔想個學生妹難受，再搞唔掂佢可能真係會喊。於是我問佢需唔需要幫手，佢把聲好細同已經好震：「唔該幫我閂左佢呀……」真係聽到都覺得慘。為左令到佢冇咁緊張，同佢傾下偈：「你邊度落車呀？」「xxx」，好，仲有幾個站，夠時間。我拎起把遮，再問：「佢平時係點閂架？」佢指住粒掣「平時係㩒呢度既。」望左下，冇野 click 住呀，粒掣也都冇爛到，應該都整到。我將個下巢向上推一推，返返去一個盡開把遮既狀態，再㩒下粒掣，佢即刻鬆返，然後就好順利咁閂左把遮。

我唔知個學生妹本身為人係點，但佢果陣時就應該真係好驚驚，可能佢拎住果把橙色遮真係好鮮豔，喺黑白灰既地鐵又的確係好顯眼既。我覺得佢似係驚俾人擺上網，因為依家ｄ人真係無聊，有事冇事都影一餐，不過又好彩好多人都耷低頭玩緊電話，如果真係好奇望到，見到佢既動作都應該知佢只係閂唔到遮，唔會太大驚小怪既。希望個學生妹冇 PTSD，快ｄ忘記呢單野佢啦。