早餐，食完 hea 咗陣就整大龍鳳——日式燴牛肉。

星期四去街市買餸時已經買咗牛肉片同白菇。今次挑戰西餐嘅麵撈，要煮到牛奶朱古力色。唔可以燶，所以好緊張同專心咁煮。

煮完個完汁，差唔多係 E 返到屋企嘅時間，放低啲嘢先。等咗陣，又有啲肚餓，都係食啲嘢先，好耐冇食餃子，就佢啦。食完洗完，諗諗吓，都係唔等佢，煮咗先。

煎咗頭先醃好嘅牛肉片，再拎起。炒洋蔥，半透明之後放埋菇。嘩，原來啲菇好多，個大煎 pan 一下滿晒。好彩仲裝得落，係炒嘅時候要小心啲，唔好整到周圍都係。炒咗陣就放返啲牛肉落去，再炒炒炒。

就咁啱，E返咗嚟，等佢用咗厨房先，順便焗一焗啲嘢。等佢食完嘢，我又繼續，將之前煮咗嘅汁放埋落去，攪幾下，冚蓋，煮8分鐘先。又攪幾下，又煮下，重複咗2次之後覺得仲係勁多汁。開蓋一路煮一路攪，15分鐘左右，啲汁終於收得差唔多。試味，落多少少鹽，收工！

唔知點解食咗咁多餐到咗4點幾都係有啲肚餓，於是食咗今日等3餐 _(:_」∠)_。

食完冇幾耐就要岀門，做步兵，買 pizza maru 返阿媽度食飯，好味依然。