長假期第一日，９點鐘左右就起左身，唔知係咪因為尋晚瞓之前諗左咖啡凍奶茶，起身時冇乜特別肚餓既感覺。但又覺得要食下早餐，於是就焗左個麵包同沖左杯鮮奶咖啡。

話咁快又係換季時間，趁假期而且又開始熱，係時候要出動風扇，需要清張凳出來放風扇。同時斷捨離一下，但執到出來既都係一ｄ好舊既衫。太新淨既唔係好捨得掉，極殘果ｄ連回收既資格都冇，唯有剪做碎布，用來抹地板又或者清潔。可以回收既係一ｄ勁唔舒服既牛仔褲，同有少少殘但仲著得既冷衫。

執執下野，有ｄ肚餓，難得喺屋企有ｄ郁動，可以解決成碗喇沙，食完係勁飽。

換季真係好攰，要係咁彎腰，數次停低休息。但同時也都比我預期既快，３點半左右已經搞掂晒，可以坐低睇 Youtube。上次搞左一日，仲有ｄ衫係食完晚餐之後先再執，今次真係快左好多。

再來多個下午茶，係宜家家私既花生醬曲奇，味道係幾好，但都真係太甜，冇茶或者咖啡係唔會食得落，應該唔會再買。

做晒所有野，４點都未到，開始覺得假期第１日有ｄ長……不過呢個假期好多野做，來緊幾日都有安排，應該好快過。

六點幾再清潔埋餐具架，今日真係做咗好多嘢 ٩(˃̶͈̀௰˂̶͈́)و。