豐富嘅早餐，一蘭拉麵，味道係唔錯嘅，但勁咸，我覺得個湯包可以分2次用。

食完就拎啲舊衫岀來，準備縫補補。一開始整就好似停唔到，同自己講真係要做運動。到放低啲嘢，再啲沙發坐咗幾分鐘，冇嘅，純粹拖延 _(:_」∠)_

最後都有做到運動，做做下收到電話，洗衣機會提早送到。只係做咗9字運動，拿拿臨沖涼吹頭換衫。

佢哋真係好勁，由佢哋㩒鐘到搞掂只係用咗4,5個字。

我一開門佢哋已經即刻想入面，我即刻叫佢哋等一等，開大少少個鐵閘先。一個後生仔就入厨房度部舊機嘅尺寸，門岀面就有嗰人喺度拆緊部新機，聽到發泡膠聲。岀面嗰個人一陣就拆完部機，拎咗板車入厨房，眨眼之間，個後生仔已經推咗少少部機岀來，打斜少少，放上板車。佢哋合力將成架機放上板車，用板車嘅其中一個轆做重心，慢慢將板車轉90度，呢招我喺裝修時都有學過。跟住就部機推岀厨房，由於部機同厨房玻璃趟門差唔多尺寸，真係啱啱好，大少少都過唔到，佢哋期間除咗後生仔轉身時有撞到門之外，部機係冇撞過度門。

部機推岀厨房經過廳，岀大門時佢哋也都有撬起板車，冇壓到任何門杉。我見有少少時間，即刻拎住除塵紙入去，真係勁多衫嘅纖維，仲有一灘水，又去拎幾張紙巾，抹咗3次先清潔完。期間佢哋已經推咗新機入廳，我叫佢哋等一等先。一搞掂佢哋就推埋入厨房，年長啲嗰個落咗機就拎板車走咗，剩低後生喺度駁喉同試機。開機試水，見冇漏水就影張相。我簽完張單，佢已經急急腳想走，我就話對埋個型號先，開洗衣機門對完啱數先放佢走。

佢哋全程合作無間，feel 到佢哋應該係裝咗一萬部機先會咁熟練。練習嘅環境仲要係香港呢啲迷你樓，唔通真係要啲咁苛刻嘅練習環境先可以練到咁 🤔。

佢哋走咗之後我就極速炒咗個飯，又光速食完，岀街買嘢。先去宜家家私，途中行過超級市場，入去睇下牛油果，冇心水嗰款，反而買到波子提。跟住喺宜家家私買咗煙三文魚，bagel 同咖啡粉，買完磨完先醒起我唔係要咁碎，不過試下都好。

跟完行過去吉之島，買到牛油果，買齊啲餸，滿載而歸。返到屋企繼續縫補補，又整咗沙律醬。

夜晚冇煮飯，我到7點半先覺得肚餓，整個🥯食下先，超好味。今次嘅酸瓜仔份量啱啱好，咸度也啱啱好，不過我加咗自制溫室青瓜落去，多星少少水，下次擠走啲水佢先。