話說我啱啱去完藝術節，今次係《吱吱喳喳圓舞曲》維也納現代聲音樂團音樂會。音樂我一向都覺得有啲深，除咗流行音樂外，其他我覺得自己係完全聽唔明。

藝術節會再揀音樂節目，係想再俾多次機會自己，睇下會唔會鍾意，依家證明真係唔係我杯茶，都無謂呃自己。但我也都好好奇，到底呢類型嘅音樂，係咪真係讀音樂嘅人先聽得明，明白佢勁喺邊嘅呢？又或者係玩音響？定要識樂理？普通人有冇可以聽幾隻CD就會鍾意嘅呢？除咗嗰啲耳熟能詳嘅名曲之外。

聽唔明就唯有留意下其他嘢，望下呢度望下嗰度。一開始間唔中隱隱約約聽到2,3下輕笑聲，又有幾下好明顯係電子音樂。好奇怪，一定唔係觀眾，好明顯係場內音響放岀來。但又睇唔到邊個控制，喺我左手邊有部勁大嘅S鋼琴，唔通喺佢後面有個電子 panel？因為每首曲幾時開始係指揮決定，至少要睇得明指揮先可以夾到播嘅時間。喺演奏咗2首曲之後，有個遲入場嘅人聽到有啲電音，我見到佢嘅表情都好疑惑，一副「我係邊個，我喺邊度」嘅表情，我望到有種「同是天涯淪落人」嘅感覺。你冇聽錯呀，真係有電音呀，而呢個係類小型交響樂團嘅演奏會。

聽下又遊下魂，觀察下啲樂手，見到有1個小提琴同1個中提琴手好似好滿意今晚嘅表現，有幾次演奏完都露出滿足嘅笑容。表演緊嘅時候又一副享受嘅樣，唔知佢哋有冇進入「心流」呢。喺眾多樂手嘅罅隙中間我望到最後排嘅鼓手，但佢又唔止負責鼓，好似隔一陣就會拎唔同小型樂器岀來彈幾下咁，好忙。

一開始吸引到我注意嘅係佢嘅外觀，首先佢係全場唯一唔係著黑或灰色衫嘅人，係紫色，仲要唔係深紫色。跟住佢係地中海，頭髮灰白，散落2邊，有少少不修邊幅嘅感覺。有一 part 佢係深奏鈴鼓，方法係五隻手指尖拍落鼓皮度。如果有部 cam 影住佢塊面同好有節奏嘅五指拍緊一啲嘢又唔影埋樂器，加埋佢又一副「here is Johnny」嘅樣，真係好似拍緊驚慄片。

仲有一個粗壯大漢，光頭又一副兇狠咁嘅樣，而佢演奏嘅係手風琴，一種感覺係快樂又或者鄉村嘅樂器，格格不入。仲有個指揮，佢居然係著飄逸嘅裇衫，仲有漆皮嘅尖頭皮鞋，好貪靚，間唔中仲會見到佢嗰圈小豬腩肉。

喺聽唔明音樂嘅時候，我喺度諗，點解我哋需要音樂？點解我哋會走去聽一啲自己唔明嘅音樂，冇歌詞，有好幾次仲覺得有啲吵雜聲硬攝入來，完全唔協調。點解呢？有一下我覺得自己係一隻識坐定定嘅馬騮，望住台上一堆發岀聲音嘅人類，「what are you human beings doing?」。唔明。