因為冇飲咖啡，開場之前好眼瞓，但個台一著燈，一開幕，即刻醒晒。

根據場刊，第一首係《末廣狩》。表演人員分前後2排坐，全部穿和服，既美麗又豪華，而且排場十足。前排有5個藝伎，樂器係鼓同簫，衣著係色彩鮮艷嘅和服。後排就有2個歌手同3個三味線樂手，歌手係著素嘅深色和服，而樂手係藝伎，同樣著得好靚。

之前收到飛時見到係第一行，以為會太前，心諗 GG了。點知一開幕，好正，近距離見到啲藝伎，連佢哋啲衫都睇得好清楚。好間唔中仲會同佢哋對上眼，感覺好微妙。

第一節同第二節中間有互動環節，由當中一位英文能力好好嘅藝伎主持。一開始簡介藝伎嘅級別，由衣著髮飾等等去分辨，也介紹學徙晉級需要嘅時間。跟住就係問答環節，有日本人想睇呢個表演應該係好正常，畢業喺日本都唔係咁易可以睇到，但又估唔到有個日本人會問問題。由於佢問呢題目有啲長，中間仲停頓咗2次，最後由本身選5位觀眾變咗得2個。

除咗首尾2首曲目同預定一樣，中間3首應該有變動，少咗一首，而且提早咗半個鐘完場。但因為我好多都聽唔明，所以都唔知係少咗邊一首。

今次真係好驚喜，雖然冇謝幕影唔到相有啲可惜。但又好符合日本特質，啲貴重嘅嘢係冇咁容易喺網上搵到，尤其係要天價先可以睇到啲藝伎表演。

同好多嘢一樣，藝伎都係一個式微緊嘅行業，日本只係剩低200個左右藝伎，相信只會買少見少。如果可以發展為藝術表演都不失為一條岀路，但又可能會失去嗰種神秘感，冇咗嗰種偷窺超有錢人生活嘅刺激。