首先要讚下自己先，鬧鐘一響，8點半就起身。

出門之前見到有太陽就將啲花擺啱位先。

跟住就去茶記食早餐，又係雞翼沙嗲牛通熱奶茶，好味。

今日渣馬會封路，尋日都仲有啲擔心，好彩地鐵一切順利。

睇完戲都只係12點，陽光燦爛但又有啲凍，尤其係去到冇太陽嘅地方又有風，係真凍。

去搭地鐵途中有啲口渴，飲咗熱嘅香蕉豆奶，好耐冇飲豆奶類，蕉味好假，好彩依家啲嘢冇以前咁甜，叫做冇咁惡頂。

返屋企之前去買餸先，估唔到最後要行 2 轉先買得晒啲嘢，第 2 轉時順便去埋圖書館。

臨返屋企之前 E 通知我網上訂購嘅嘢有得拎，但我見到批貨時真心被嚇親，痴咗線，送咗 8 排 9 盒嘅麥精，冇可能拎到，唯有借車仔。

一路顛簸，好不容易返到屋企，因為大家都唔係好飲麥精，決定送俾管理處，但又唔知佢哋要唔要。

好彩佢哋欣然接受，仲要表現得好開心，無論如何我都比佢哋開心。

再還返架車俾超級市場，最後最後我係行咗 3 轉，運動量唔覺意達標 _(:_」∠)_。

跟住再返屋企大龍鳳，煮肉醬意粉，高壓再收水，唔錯唔錯。

是日完，好攰 _(:_」∠)_。