早餐

去完旅行，又病咗，一眨眼已經返咗一個禮拜工，時間過得好快。

收工之後過北角幫 E 拎嘢，極速完成任務。本來打算去搵老朋友，但咁啱有間「五條友」，難得咁早，餐廳完全冇人，一於就佢啦。

但又發生不幸事件，順利落完單，佢問咗我一條問題，我聽極都聽唔明，2、3次之後佢都放棄。

我有啲介意，好想知佢問乜。跟住又諗起喺日本嗰次，我喺摩斯漢堡都係聽唔明個職員問乜，最後俾佢整估，買少咗個薯條。我一直好介意呢件事，覺得自己努力學日文，最後都係落唔到單。又覺得自己嘅真心被踐踏咗，明明係佢哋唔學英文，搞到我哋要學日文，好，學就學，學完仲要俾你玩，好唔甘心。一直一直都好介意，覺得自己好委屈。

到今日發生同一件事，我突然間有啲明。我諗佢哋都覺得自己好委屈，點解個客唔明我問乜，到底係發生咩事，係咪我英文太差之類，其實雙方都難受。

好，釋懷啦，我同自己講，努力學英文同日文啦。