尋晚只係覺得喉嚨有少少痕，今日真係有少少病咁。喉嚨痛咗，然後有鼻水。

下晝去買餸同下午茶，估唔到要行2、3間先買到豬膶。粥係幾好食，係菜乾唔夠淋，下次應該同啲豬骨一齊煲。話說呢個原本係上星期某日嘅菜，但諗諗吓有啲多功夫，所以轉咗做假日先食。

我冇買到煲湯嘅豬骨，轉咗金沙骨，6舊。解凍之後，煮嘅前一晚落唔夠半茶匙醃一晚。

今日5點半先用高壓煲煲咗金沙骨先，高壓7分鐘，我仲要落咗雞湯去煲。好快，搭正就煲好，呢個時候，開始用電飯煲煲粥，半mug米，原廠設定係煲一個鐘，但我４個字就夠，set 定 timer。

浸定 d 菜，timer 響既時候，先㩒停個電飯煲，洗菜、切薑同切埋豬膶。將高壓煲入面既雞湯倒落個不鏽鋼度，加多少少水，放薑片，先煮淋ｄ菜芯先。煮左３分鐘（事後覺得可以煮夠４分鐘），放返ｄ金沙骨同白粥落去，滾左之後，放埋豬膶。其實豬膶係好快熟既，煮一陣就得，試味，落鹽，食得。

搞完一大輪，真係覺得係假日先整到。賽後你點睇，除左上面有提到既某ｄ之外，最後就係豬膶太多。食到一半，已經覺得有ｄ濟，但最少都要買呢個份量，下次或者可以試下整碎少少易ｄ入口。記得以前細細個呀媽煮豬膶粥係碎晒，應該仲會有埋豬肉碎，我諗呀媽係我驚我地唔食。同埋意料之外既係，金沙骨好好食，真係估唔到。呢個粥今個冬天可以再整多次，雖然覺得唔會再凍……