因為今日要睇戲，所以尋晚11點左右就瞓，但估唔到凌晨2點左眼勁痕，痕到醒咗。痕得有少少過份，有啲擔心，起身去廁所望下，嘩，隻眼俾我捽到勁紅，搞到我驚驚，拿拿臨用水洗一洗，止一止痕先。
跟住就唔係好瞓得著，個鼻真係好唔舒服，食啲嘢又睇下 Netflix，到4點幾先訓。
朝早8點幾個鬧鐘響，個人勁攰，勁唔舒服，第一次覺得自己真係「唔得」，決定唔去睇戲。一直瞓到11點幾，起身食早餐。
食完 hea 咗陣，跟住3點又再瞓過，不過瞓得麻麻，熟睡嘅時間應該唔多，瞓下醒下。5點又起身，之前都諗住岀去買餸，但都仲係好唔舒服。個鼻係有好返少少，但個人就勁虛，冇乜力，又成日覺得肚餓，不過呢個應該係敏感藥嘅副作用。
夜晚例牌返屋企食飯，食完又去巡視業務，萬寧做緊89折，多人到呀，不過我都有收穫，買咗2盒敏感藥，真係好有用。