8 點過少少就醒左，又瞓唔返，不如早ｄ起身去買餸。

先去歎個靚早餐先，想食平時要等好耐既雞扒。圖書館附近，呢棵４５度傾斜，另外一棵仲慘，成棵冚左。ｄ麻雀好鍾意呢２棵樹架，唔知以後佢地會企邊。

落定柯打，去到餐廳都要等超過１０分鐘，但一切開塊雞扒，唔熟，換過第２塊，再切，都係唔熟，再換。最後佢俾左塊薄身既我，仲好明顯係煎左多時間，兩面都比之前果２塊燶少少，岩岩煎好又夠燶，好味！

好難得打完風ｄ菜都冇加價，仲有幾多貨添，我懷疑呢批貨仲係星期五既貨。但我已經喺百佳買左菜，所以就冇再買菜，淨係買左豬肉、水蜜桃同香葉。

返到屋企就睇書，ｈｅａ同睇動漫，今日天氣真係好到離晒譜，好好太陽，花都影得靚ｄ。唔知係咪因為氣溫降左，突然之後幾朵一齊開，好熱鬧。但我睇返ｄ相，明明我買既時候係白色，依家就變左紫心，原來係因為酸鹼度，我以為淨係繡球花先係咁，又長知識了。

夜晚係勁高纖既韮菜花炒蜆再加ｈｅａ　ｈｅａ肉丸海帶紫菜湯，某人想飲啲ｈｅａ湯，前幾日試過咁樣覺得清清地都幾好，於是今日再ｅｎｃｏｒｅ。但係唔知點解個湯苦苦地，某人就覺得係紫菜問題，最後就食左ｄ肉丸就算。

３日假真係好正，聽日要返工啦。