趁朝早比較有心情，煎咗餃子來食，新煎 pan 真係好正！



食完就例牌 hea 下睇下動畫。到下晝 4 點，因為今晚有大龍鳳——炸雞！想一次過炸多少少嘢，唔覺唔覺買咗好多嘢返來。

做咗前期準備功夫先，整咗日式茄子個同天婦羅個汁，切埋啲南瓜。

第一樣，炸咗蔬菜先，茄子。一直都好想知走油到底會點，終於可以試下。結果係大成功，原來啲色真係靚好多，唔單止冇失色，仲因為有層油喺上面，所以光咗又靚咗。呢堆茄子係日式茄子漬用。

跟住就係蔬菜天婦羅，買咗南瓜同甜豆，連埋啲茄子。但天婦羅唔太成功，啲粉醬「痴」唔到上去，有諗過係咪放咗太多水，但發現係做少咗沾乾粉呢個步驟，下次再試下先。

最後最後就係戲肉炸雞啦，又係因為想一次過炸多啲，所以用晒２包唔同味既炸雞粉，不斷炸炸炸。炸下炸下覺得自己慢慢掌握到個技巧，先大火燒熱啲油，到啲雞放落去果下，又熄細少少個火。有啲大舊少少既，再炸多次。我覺得炸嘢最怕嘅唔係驚俾ｄ油彈親，而係驚ｄ野唔熟，尤其係肉，大太火又驚佢燶。

晚餐就係食呢啲

食完又繼續炸炸炸，最後搞到夜晚９點幾先整完，覺得自己係炸晒呢世人要炸既雞。但都幾有成就感，之前一直都覺得炸野係一樣好難既野，依家終於都試過啦，其實俾我想像中易，而且又好食，唔怪得之ｄ日本主婦會喺屋企炸野啦。