連續幾個禮拜日可以瞓到 10 點先醒。之前唔知係咪因為壓力太大，成日 7 點幾生理時鐘醒咗之後瞓唔返，然後夜晚又差唔多 12 點先瞓，搞到星期一成日都唔係好精神咁。近呢 3 個禮終於都回歸「正軌」，瞓到 8 個鐘，嗰種瞓到腰酸背痛先醒嘅感覺真係好正。

醒咗之後，煮壺咖啡，食個早餐。

然後又繼續做做做，上星期因為要用咗個薯仔，所以買咗 1 包小青瓜，整沙律淨係用咗 1 條，剩低 4 條。依家夏天，用來整拍青瓜就一流。整完拍青瓜，又係因為要清廚餘，上星期啲芥蘭仔嘅葉，加罐五香肉丁用來炒飯，又解決一樣嘢。用晒雪櫃啲嘢，好嘢！

發現用電腦寫 blog 真係會寫多好多嘢，可能手機打字真係太慢，語音輸入感覺又好似好奇怪咁。諗緊係咪要恢復每日開電腦寫 blog 呢個習慣，但收工之後做埋家務又真係太攰，anyway，試下先，睇下可以堅持到幾耐。

---------- =u=V ----------

將之前睇咗嘅戲同書都整理咗，做到一半覺得好肚餓，不知不覺原來已經差唔多 3 點，又係時候食第 2 餐了。

食完又繼續整，一直到 4 點幾。今日某人出左街，屋企得我一個，好靜又好正。