前宇宙最強巨星搏翻身之作！尼古拉斯基治首度「演自己」，一場搏到盡、笑到爆的動作喜劇！懷才不遇的前巨星基治（尼古拉斯基治　飾），瀕臨破產邊緣，唯有出賣自己出席瘋狂「基粉」富豪哈維（貝哲羅柏斯卡　飾）的生日派對，以賺取100萬酬勞。估唔到，這份筍工突然失晒控！CIA特工踢爆哈維原來是大毒梟，仲要求基治幫手做臥底救出人質！這位傳奇奧斯卡影帝，決心盡地一煲，挑戰成世人最破格的角色：「尼古拉斯基治」！觀眾將置身一場人生如戲，戲如人生，真假難分的爆笑冒險之旅。

---------- =u=V ----------

人生如戲，戲如人生。

呢個時候睇呢套戲，我都幾有感觸。我「覺得」自己同主角一樣，正處於事業既低潮，但諗諗下，真係蚊髀同牛髀。

就如戲入面有一幕哈維數緊自己最鍾意既 3 套電影，大意係「真係好難揀，視乎你果陣時心情、際遇」，我覺得好岩，如果我係返緊工，平平淡淡咁做緊社畜既話，我唔會有咁大感觸，都可能覺得套戲冇咁好笑。電影就係有呢種力量，令到觀眾可以代入去角色入面，雖然未必可以同主角一樣，好順利咁解決到個問題又或者係搵到一個好明確既方向，但的確係有幫到我抒發心情。電影果然係我生命之中不可或缺既一部分。

喺同一幕度，仲講左「成見」同「了解」，當哈維話自己最鍾意果套戲係《柏靈頓 2》時，尼古拉大意係講：「我唔係想講你品味差又或者係呢套戲唔好睇，但 seriously？」於是，佢地一齊睇左呢套戲，最後 2 條友喊到「fi li fe le」。哈維話佢喺呢套電影入面學識左做人最重要既野，就如「木兔專家」赤葦所講：「可能在別人看來滑稽可笑的小事，對木兔學長來說卻非常重要」，如果可以了解同明白某啲小事係人地眼中既大事，我諗人同人既相處會更加融洽。喺電影結局，經歷左呢一連串事件既尼古拉喺同老婆同埋個女一齊既時候，同以前好唔同，唔再係自己迫個女睇佢鍾意既電影，而係俾個女揀，而佢個女就係揀左《柏靈頓 2》。

呢部電影仲慨嘆左行業既「大片化」（我真係唔知可以用咩字來形容呢個現象），我一直以為得香港呢啲小市場先有呢個問題，原來荷里活都有同一個問題。觀眾愈來愈追求官能刺激，鍾意睇大片，而市場因為要迎合觀眾，就愈拍愈多「漫威」式電影，形成左一個惡性循環。喺電影入面，佢地 2 個想拍一部「俾大人睇既、有深度既、劇情導向」既電影，我相信同時都係導演既心聲。最後，電影中既電影係以「完美拯救被綁架女兒」既大團員式結尾作為結局，其實導演並唔係話排斥大眾電影，只係希望市場可以更多元化，而唔係獨沽一味。

睇完呢套戲令我鬆一口氣，從搵工既挫敗中走左出來，同時我都反思，可能我真係迫得自己太緊，我要學會 take it easy 同埋 never shit on yourself。

P.s. 我依家會想去睇下《柏靈頓 2》