夜香・鴛鴦・深水埗 Memories to Choke On, Drinks to Wash Them Down

導演：梁銘佳、Kate Reilly

 

我好鍾意呢套電影，尤其係第一部〈出城記〉，對白幽默得來又有少少漫畫式嘅誇張鏡頭，可能太耐無睇過喜劇（仲要係港式），覺得好驚喜。

 

 

故事係講由 Mia Mungil 飾演嘅外傭同梁卓美飾演嘅婆婆，某日企圖由元朗勇闖中環嘅故事。婆婆收到同鄉嘅電話，叫佢記得去中環參加同鄉會活動。婆婆覺得大家當年一齊游水來香港，是真正嘅生死之交，依家大家都老喇，見得一次得一次。所以就算婆婆個仔唔準外傭帶婆婆出街，婆婆都想出去。外傭透露，如果婆婆個仔知佢帶婆婆出去（去一啲遠嘅地方）就會炒左佢，但婆婆真係好想去，於是外傭就叫婆婆發誓絕對唔會同佢個仔講呢件事，同時錄咗 video 作為證據。

 

婆婆由R啫啫、同鄉、豉油、夜香講到肛探熱針、再講返R啫啫，由行路講到搭小巴。搭緊小巴時，婆婆話要帶外傭去探個仔，嚇到外傭鼻哥窿都無肉。好在外傭醒起呢架小巴係循環線，到達終點時，外傭就同司機講返轉頭。到呢度，就係成個故事嘅中段，小巴回程開始，故事也相反而行。為咗吸引婆婆嘅注意力，令佢無發現其實佢哋唔係去緊中環而係返緊屋企，外傭由前部分被動咁聽轉為主導，不斷主動同婆婆傾偈同問問題。於是，婆婆再由R啫啫、肛探熱針、夜香、豉油講到同鄉、再講返R啫啫，直至返到屋企。外傭再扮 2 個人已經去完中環，啱啱返到屋企好攰。

 

從對白入面，都知婆婆其實係有老人痴呆，有時會不斷重複同一個話題，後半段某啲說話同前半段又對唔上，例如，前半段婆婆話佢地係游水來香港，後半段就變左搭船等等。就係因為婆婆有老人痴呆，所以先俾外傭「得逞」，令佢得以保住份工，呢一種因為誤會而發生嘅故事，都有少少80/90年代香港喜劇電影 feel。導演特別用 4:3 畫面去拍攝以及最後用 80 年代嘅歌「浮生六劫」作為呢一部嘅結尾，歌詞「人海飄泊」以及「令我隨處打轉」同故事真係好夾。

 

P.S. 導演之一嘅梁銘佳係《叔·叔》嘅攝影指導

P.S. 電影 FB: https://www.facebook.com/memoriesanddrinks