收工之後就出發去柴灣，原來柴灣站係半露天，以為所有港島線嘅站都係深入地底嘅添。

一出地鐵車廂就聞到好香嘅嘢食嘅味道，似係焗緊啲朱古力味嘅麵包或者曲奇。

香港月台就一定冇舖頭啦，落到去大堂嗰層，都只係得啲普通舖頭，其他地鐵站都有呢啲舖頭，又唔見佢哋會散發出呢類香味，所以應該唔係佢哋。

到我出咗站，去到相連嘅新翠商場，謎底終於都解開啦，原來係瑞幸咖啡，真係好香，同埋都幾多人幫襯緊。

由於事前已經睇過地圖，所以好順利咁一路沿住天橋行過去第一個目的地——潮州粉麵舖。

嗌咗以前金星嘅配搭——牛腩拼墨丸，牛腩嘅味道係似嘅，有啲爽又有少少肥肉喺中間，好味。墨魚就唔係好似啦，不過都好味。

食完就冇 hea，直搗黃龍去圖書館。但由於已經入到屋邨，有啲迷失，前後問咗 2 組人。

途中經過個公園，柴灣俾我嘅第一個感覺就係咁，有啲舊有啲殘，但又好乾淨。同好多舊邨一樣，日久失修，頭先仲經過一個類似溜冰場嘅石屎地，有嘢已經壞咗冇維修，好 hea 咁用紅白線封咗。

去到圖書館，同大部分有返咁上下年代嘅圖書館一樣，都係喺市政大樓入面，樓下就係街市，然後有個搭𨋢嘅大堂。

圖書館入口喺 4 樓，嗰層係兒童圖書館，要行旋轉樓梯上 5 樓嘅成人圖書館。一上到去，個感覺有啲似中央，因為中間係挑空，望到樓下。

搵到想睇嘅《彼得林區選股戰略》，好快咗揭揭揭，最後都係冇借到。

最近有啲心煩氣躁，所以冇再借 technical 嘅書，最後借咗一直想睇嘅《少年 H》。仲有《史丹佛給你讀得懂的經濟學》，了解下呢個世界係點運作，第時失業都冇咁驚？！

走時好驚喜咁見到間美亞文具舖，兜咗個圈，跟住就離開柴灣返屋企。