7 點左右醒過一次，去左轉廁所，再瞓，再醒時已經差唔多 9 點，起身！

唔係好肚餓，唔食嘢住，今日係要洗床單，但又冇乜 mood，唔係好想做嘢

我決定唔勉強自己，做住其他納雜嘢先，執下尋日買嘅嘢

發現冰格太亂，想拎啲點心出來蒸都好難，於是又執下雪櫃

見到剩低 3 個水餃，清埋佢先，先蒸 7 分鐘，拎出來揭開啲荷葉先，放埋個流沙奶黃，蒸多 10 分鐘，時間啱啱好，流沙，好味

食完嘢又睇埋「鬼滅」，終於都有 mood 洗床單，起動

最近聽咗張震嶽嘅《跟著感覺走》，老實講，我覺得麻麻，但好啱我今日嘅心情

每日都有好多嘢要做，家務呢啲嘢又係做極都仲有，又唔係返工，唔想做時咪唔好做住囉，又唔會點嘅，都係唔好俾咁自己咁大壓力，心情愉快先最重要

洗完床單就繼續消滅啲 to-do item，逐點擊破，good

縫埋之前買嘅貝殼鈕，我係嫌之前嘅金屬鈕太重，但買嘅時候又冇度 size，買返來嘅鈕太大，諗緊係咪要剪開個鈕門

今日再睇返成件事覺得自己真係多舊魚，我根本唔會成日扣起手袖位，因為係夏天衫，佢成日都係摺起，就算粒鈕大少少都冇問題

由於佢真係只係太咗少少，又唔係成日用，所以我縫完之後，格梗扣埋佢就完咗件事

另外一樣多舊魚嘅係，個貝殼鈕同金屬鈕係一樣重，每粒 4g，笑，不過個貝殼鈕就平嘅，洗衫嘅時候（應該）唔會係咁拍打洗衣機，都有好處嘅

下晝 3 點半左右食咗個勁難食嘅下午茶，首先係清廚餘，食咗上個禮拜煲粥嘅 2 舊雞

跟住就係戲肉，係半個好難食嘅椰絲包，E 尋晚食嘅時候已經話好奇怪，叫我試吓，但我當時好飽就冇試到

我以為只係平時雞尾包嗰種「機油」味，又唔係喎，佢嘅問題在於佢係冇味，椰絲唔香也都都唔甜，有一種唔知自己食緊乜嘅感覺，真係唔掂

個甜餐包就中規中矩，由於已經喺雪櫃超過 2 日，已經好乾，我焗之前都有撒少少水喺面，焗出來嘅效果係幾好嘅

但果舊牛油好淡，冇乜咸味，搞到我最後要再加明太子麵包醬

然後杯特調咖啡又冇我想像中咁好飲，我係加咗桃汁同檸味有氣水，完全冇桃味，也都唔甜，好失望

今日食咗好多勁唔健康嘅嘢，有少少內疚，仲要唔好食，搞到自己都有啲嬲，笑

夜晚例牌返阿媽度食飯，今日早咗出門，好早就返到，決定去巡視業務

估唔到又真係俾我執到平嘢，$11，٩(˃̶͈̀௰˂̶͈́)و，仲要係真奶做嘅，我睇過幾個唔同嘅牌子，有啲係奶粉，有啲係油，原來用真奶做嘅唔係咁多