正如尋日所料，今日真係全日都喺出面

好彩深圳銀行星期六開全日，我哋可以遲啲起身，約左 J 10 點食敏華，我同 E 就早啲去到

我哋去到時都有幾組人，大概 7-8 人左右，以為有排等，點知好快有位，我哋 9 點 9 已經入座，J 仲未到，問：有冇咁想食

非也，因為我成日都見到有人排隊，諗住有排等，原來啲食客係流轉咁快，可能係因為第一輪啲老人家啱啱食完走左，坐低一陣之後餐廳已經有一、兩張吉台

食完就行過隔離搭跨境巴士直接過深圳灣，原來勁方便，唔使搭鐵轉來轉去，同埋勁快，8 個字左右就到

我地落車時聽到司機話過完關之後去返 xx yy 號上返巴士，我哋以為仲要上車，好彩 J 同我地講我哋唔使，已經係總站，笑，我哋真係大鄉里

根據我所搜集到既資料係要有個實名認證嘅電話，但 J 同 E 話可能依家已經唔使，想去銀行問一問先

原本我哋已經搭的士去到電話公司鋪頭前面，只好行過去表面上只係 4 個號碼之後，但其實要過條馬路先去到嘅銀行

去到銀行問完，佢都係建議我哋開個大陸電話，話如果係用香港電話開嘅戶口有好多限制，可以做到嘅嘢好少

於是我地又行返轉頭，開咗個電話號碼，又同網上面講嘅一樣，要 join 個貴 plan 先，半年之後先可以轉平 plan，即係點都要食你一筆，==

開咗個電話又返返去銀行，一開始因為收唔到 SMS 卡咗勁耐，好彩將張 SIM 卡換落部舊機之後就收到

個職員幫我用機開戶口，前前後後入咗無數次電話號碼同回鄉證，中間又因為我喺 APP 已經 set up 咗香港開嘅大陸銀行戶口，要 unlink 再 link up 返新嘅卡，又搞咗一陣

最後最後就係去 counter 將以前收到嘅利是同硬幣入落戶口，依家拎住啲現金真係冇乜機會用到，既然一場來到，就算要等都想搞埋佢

到搞掂晒啲嘢已經 3 點半，而銀行係閂 4 點，意料之中又有少少意料之外，搞銀行嘢要預成日呢個假設真係成日都啱

我地都肚餓啦，去商場食嘢啦，點知連呢件事都有意料之外嘅嘢發生，商場個俾車用嘅入口無端端封咗，搞到個司機兜咗個大圈，最後又返返去我哋一開始來嘅地方，然後搵個位放低我哋，個司機仲要冇再收我哋錢，真係油錢都蝕埋

而我哋落車之後係由後門入，仲要勁多騎兵喺我哋隔離無聲擦過，真係勁恐怖

好不容易去到商場，嘩，人頭湧湧到一個點，成個商場逼滿晒人，唔係誇張，係真係成個商場都係人，連 J 都勁震驚，佢話佢之前就算星期六都唔係咁多人

E 揀咗間心水餐廳，但要 4 點半先再開返，於是我哋就坐低等咗 2 個字左右，一夠鐘就去攞飛仔，個服務員一定心諗：有冇咁想食呀

講真，我哋都真係肚餓啦，搞咗成日，又只係食咗個早餐⋯⋯

我哋嗌咗半隻片皮鴨，毛血旺同一煲旺菜湯，估唔到想食深色嘢嘅人係 E 而點清湯嘅人係 J，真係風水輪流轉

呢餐都唔平，埋單都差不多 $400，味道就普通啦，主要係我一早食咗個勁辣嘅魷魚，搞到我胃口大減

食緊嘢嘅時候 J 幫手嗌咗喜茶，但前面仲有百幾杯，到我哋食完餐飯再喺個商場度兜咗個圈，再上返去都仲要等，J 都去問咗 3 次，都係未得，最後可能都有等咗成 4 個字

飲飽食醉之後我哋就兜埋商場嘅另外一邊，行埋出去睇下附近係點，我相信冇咁多人嘅時候呢個商場係會行得好舒服嘅，可惜依家係暑假，周圍都係一家大細，又多人又吵雜

到 7 點幾大家都攰啦，返屋企啦，一行出商場 area，見到啲車塞住咗就覺得打車無望，同今朝喺關口嘅情況一樣，都係搭地鐵啦

落到去地鐵站都好絕望，多人到呢，我同 E 又冇出行碼，只可以買飛，我哋嗰個出入口位又只係得一部售票機，大排長龍，啲規劃真係有啲差

好不容易買到飛，順利過埋關，上埋跨境巴士，返到香港落車時已經 8 點幾

我同 E 轉車返屋企，我就點都要去一轉超級市場買棵菜，今日忙咗一日，聽日真係唔想再出街

估唔到今日有八八折，又買咗一堆嘢，終於都做晒今日要做嘅嘢啦，聽日終於可以休息啦