其實我都唔肯定自己有冇去過屯門圖書館，之前有去屯門考過 PMP，已經唔記得當時有冇去圖書館度 Hea。

今日一去到就 200%肯定自己有去過，anyway，入去啦，有本書要借。

圖書館樓梯間既畫

行左 2 層樓梯，一上到去成人圖書館，第一列就係歷史系列，見到有《帝國夾縫中的香港：華人精英與英國殖民者》，好吸引，即刻就拎左先。

跟住就去搵目標書籍－－清華大學出版社既 32 周年中文紀念版《人月神話》，台灣出果本 20 周年紀念既繁體版已經俾人借左，唯有借住本簡體版睇住先。

掃左掃見到一來既熟悉又陌生既《領域驅動設計學習手冊》，既然之前睇英文都未掌握到，不如試下中文版，希望有用。

拎住三本書搵個位坐低，揭左幾頁，決定都借。附近係烹飪既書，見到有本好厚好勁既《烘焙原理》，又揭幾頁，嘩，好學術，放返埋位先。跟住就睇左幾頁日本料理既繪本書，已經唔記得書名。雖然圖書館既氛圍好正，好岩睇書，但一諗起跟住落來好多野做就決定走人。

走時見到本《 歐陸傳奇食材》，又揭下，好吸引，但已經有 3 本書要借，下次先。再經過歷史果列，突然之間覺得本《帝國夾縫中的香港》冇乜需要借，因為屋企已經有本類似內容既書。反而係行過新書上架，順手就拎左本《戰地紀事：羅伯‧卡帕的二戰回憶》，所以話，圖書館永遠有驚喜俾到我。

最後離開圖書館時借既書係《人月神話》、《領域驅動設計學習手冊》同《戰地紀事：羅伯‧卡帕的二戰回憶》。