呢個早餐真係勁難食，芋頭再蒸已經冇乜味，粟米又多纖維又唔甜，暫時係我食過最差嘅自家早餐，得個飽字。

食完Hea咗陣就出門，主要係去買返條暖嘅褲，嚟緊會降溫，返阿媽度食飯真係要有條厚褲先得。去到UNIQLO，試晒三款，男裝、女裝同童裝，最後買咗童裝。

下一站係去拎書，之前預購咗馬家輝嘅簽名版《雙天至尊》，星期五通知我有得拎，今日出街就順便拎埋。但呢個系列嘅上一本我仲未睇⋯⋯之前一直想要一本簽名版，依家終於都圓咗個心願。

原定計劃拎完書係返屋企，諗諗吓既然都出咗街，時間又好早，不如去埋宜家傢俬。於是由旺角搭地鐵去荃灣，唔使過海都要$9.8，好貴。

去到荃灣，好肚餓，睇咗間台灣麵，好貴，最後都係食咗麥當當，係一年一度嘅招財牛堡。麥當當好多人，全部都係一家大細，但好彩都搵到位，坐咗張高腳 4 人枱。我食緊嘅時候斜對面坐咗個靚仔，食到一半左手邊有個人粒聲唔出坐低咗，我心諗一定係啲冇禮貌嘅中年男人啦，點知一望原來係個女嘅小學生，唔知佢係唔好意思開口問，定係我哋呢張枱嘅搭枱味太濃，令到佢覺得我左手邊一定係冇人。Anyway，我好快就食完走咗。

喺宜家傢俬買咗個密氣罐同埋擺 A3 海報嘅相框，原本想買黑色，但已經絕咗版，唯有買個白色框嘅。買完嘢就真係返屋企，好順利咁上咗巴士，但呢架係單層巴士，勁多人，我又拎住個相架，坐到勁唔舒服。

返屋企擺低啲嘢先，去個廁所，然後就拎埋車仔去超級市場送貨，百佳一連三日買滿$168就有八八折，星期五已經幾多人掃貨，大家都係買啲日用品多。我都係買日用品，買咗廁紙同埋啲菜，仲有啲急凍點心，嚟緊長假期可以食。

晚餐係食金華火腿雞湯加旺菜，好味，味道好豐富，又鮮甜，超出我意料之外嘅好味。但我哋淨係食咗一半左右，仲有一半搵日再食。食完覺得仲有少少空間，於是蒸咗啲糯米飯嚟食，飽晒。