3 個鐘既戲，特登揀左長假期先去睇，講真，過譽啦。

文化方面，一來唔係日本人，就算係日文人，歌舞伎發展至今已經係好專門既藝術，凡人對佢了解不多，我難代入日本既時代，所以冇共鳴都好正常。二來我覺得「文化輸出」果陣味太濃，有啲攻鼻。我覺得日本既目標應該唔係對外而係對內，一個有興趣既鬼佬做女形，絕對唔係佢地想要既方向。日本依家少子化咁嚴重，歌舞伎門檻高又講血緣，相信都唔係咁多人入行，同藝伎一樣， fade out 睇來都係遲早既事。如果拍一套戲可以吸引到人入行都化算，就算唔得，吸引到多ｄ觀眾去睇、去傾都已經唔錯。

套戲唯一令我有共鳴既係「時代」，身處當中我地可能不為所覺，唔覺得被佢推著走，唔覺得同佢對抗緊，也都唔會知最後係會向邊個方向行。就好似最近興返既菲林機咁，明明已經係被時代淘汰既產品，只係因為依家大家都覺得呢個時代唔好，喺度懷念 good old days，想要搵返以前興過既野來令自己舒服ｄ。但當大家都克服左呢個咁「壞」既時代，自不然就會有 new good days 既潮流，菲林最終都係會沉寂，然後消失。

講時代、洪流同史詩都太大太遠，尤其係香港，更加唔好講對抗，大家都「得快樂時且快樂」啦，最終係唔係去我地想要既方向，我覺得都唔到我地控制。就算係幸運地同我地希望既一致都未必係出自我地手，畢竟呢個世界需要靠「運」既野實在太多。

另一個感慨係同我職業有關，我真係好想知 10 年、20 年之後再睇返呢個「凡事皆 AI」既時代會係點？到底我係一早被淘汰先定還是泡沫出現先？我到時會唔會仲做緊社畜？期待。