我印象中冇喺戲院睇過，所以當知道佢會上返時已經決定左一定要去睇，係一定。之前日本有重新上映，估唔到香港都會上返，好開心，再加上係特典場，更加要去。

我一直都好想要張海報，今次真係「機會來啦！」，點知我買完飛先知，原來有特典場都有 2 款海報，到我研究完發現 4DX 先係我想要果張。幾鍾意都好，都唔會短時間之內睇 2 次，唯有下次去日本時去啲二手店碰下運氣。

想要呢張 ><

同一間發行商派特典既方法同之前唔一樣，上次睇《排球少年》係專門擺咗張枱「cup」印仔，今次係由戲院職員派。我唔知，一早攞左飛，等到入得場既時候先知要去櫃檯拎，好彩仲夠時間。話係話想要海報，我事前都冇點研究，以為係以前嗰啲卷埋嘅海報，原來係一張硬質既紙，我見其他人好專業，帶晒膠夾，一收到就放落去，我就咁放左落袋，返到屋企時有個角已經巢咗少少。

睇完依然覺得好好睇，可能因為上一次睇已經係好耐之前，細節已經忘記得七七八八，但感覺比較深嘅係自己變成咗「小眾」呢件事。我覺得起源係「電影斷崖式沒落」加上「社交網絡」嘅效應同二元化，前者係近一兩年的確好少戲，導致啲戲院要上返「舊片」來續命。主要客源除左我地呢啲以前睇開戲、想再次回味「當年佳作」，仲有一班後生、從來冇喺戲院入面睇過「當年佳作」、吸收左網絡上充斥住「依家嗰啲戲全部都係垃圾」訊息既人。類似既仲有「某某導演嗰啲先係好戲、宮崎駿嗰啲太表面」等等，《他和她的戀愛花期》中都有類似既描述。呢個除左係導演既「個人意見」之外仲有帶出「男女主角口味一致」，其實有推動劇情既作用，但我相信啲人冇諗到咁深入，好多都只係接收左對白既表面意思。而網絡既開放同討論加劇左二元呢件事，令到大家好投入咁「維護某啲作品或者導演」，鍾意既人大講特講，然後大家重複見到同接收同一堆信息，到套戲上返時就要入場「以示支持」，睇完再上網同同好再討論、熱捧。

觸發我既正係「帶定膠夾入海報」呢件事，大家一收到海報就即刻 post 上 SNS 就已經預左，帶埋膠夾呢樣真係出乎我意料之外，原來依家睇戲送海報又或者係特典場係「一件事」。而呢「一件事」一定係某程度上可以突顯自己「品味奇佳」而變為一件可炫耀（及放上 SNS）既實際物件－－海報，再加上「我有睇」呢一個同樣可炫耀（及放上 SNS）既行為就令到大家覺得自己係「與眾不同」、感覺良好。

以前我自己都係咁，希望自己係同人地唔一樣，係一個特別既人，依家大個左諗法就好唔一樣，反而希望自己普普通通，做一個大眾就好。因為做小眾太難，鍾意既野好難搵，同時好容易消失，就係因為小眾，客群少，商業上維持唔到自然就唔再繼續。大眾既野，易搵到也都可以留耐啲，講到底，都係想自己易啲開心，老啦老啦。

---------- =u=V ----------

睇返日記原來當年係入戲院睇，傳送門：https://zoeofjune.com/article/index/7797