原來係諗住去歐洲旅行之前睇，但唔係好夾到個時間，最後係去完旅行，仲要過多 3 個月，終於都睇左。

電影入面當然係有好多隱喻，「佢既世界」我諗除左係「白人／白人眼中“文明”既世界」之外，也略有「同性既世界」既感覺。

但令到我思考既係另外一樣野，去完歐洲之後，E 曾經講過：「咁依家去完，咪對歐洲冇晒幻象囉」，佢口中既幻想其實係正面果種 fantasy。又的確係，雖然ｄ建築／風景係同電影入面既好似，但人就好唔一樣，出乎意料地冷漠，我諗係因為「個人主義」？一開始係源自於互相尊重同足夠既私人空間，但最後就係變左大家都唔係好想理大家。

而果種冷漠係有一種「你地係非我族類，唔好行咁近」既感覺，可能都係另外一類型既歧視，慶幸既係我地既「被歧視雷達」唔係咁敏感，所以都冇乜不愉快既事件。也都可能因為我一早做好左心理準備，嗱，我地一望就知係亞洲人啦，係同你地唔同架啦，係遊客來架啦，無論你地歡唔歡迎都好，我地已經喺度，冇計架啦。

由於呢種「非我族類」既事實，令到我喺睇完套戲之後有一個疑問，地球上所有人都知道二戰，所有人都知道納粹，我地喺電影入面見到文明被摧毀（雖然電影入面有講過喺件事野發生之前文明已經被破壞左），當然係會有惋惜既感覺，但我地係咪永遠都唔會有歐洲人又或者係再細分ｄ－－匈牙利人果種切膚之痛呢？我懷疑唔止亞洲，美國人既共震都未必話係咁大。大家可能到最後都只係得返輕輕一句：「唉呀，（文明）咁就冇左啦」。