3 號波中～

一起身就望下窗外，地下濕晒，晾衫桿都係，睇嚟尋晚同今朝都落雨。暫時停咗，仲岀緊太陽添，唔通今日會好天？！換衫去食早餐，跟住去採購先。

因為今個禮拜已經食過雞翼，所以早餐就揀沙嗲通同多士。點知我食晒碗麵啲多士都未上，平時都係佢上先㗎嘛，催咗個姐姐一次，佢望都冇望我張單就話整緊，之後都有幫我去水吧望咗次。等多陣都仲係未有，肯定係漏單啦，再催多次，好彩真有整緊。我仲望住佢送錯咗其他枱添，再望住佢返返入水吧，再岀返來放喺我前面 😂。由於星期日落雨勁多人，要搭枱個位勁窄，坐得勁唔舒服，食完就拿拿聲走人。

今日唔搭巴士搭地鐵其中一個原因係要用埋最後嗰 2 次都會票，今日係最後一日啦。因為真係打緊風，如果落雨就 GG，所以條路線都經過精心策劃。荃灣地鐵站落，行去愉景新城先，估唔到真係落緊大雨，好彩全程有瓦遮頭。

去超級市場買咗啲嘢但唔齊，望一望岀面，好似仲係有雨，不過雨勢就唔大。咁就照最佳路線行啦，go go go。第2站係宜家家私，順便睇吓另外一間超級有冇我要買嘅嘢，又冇。喺宜家家私買咗麵包同煙三文魚，之後就擔遮行去荃灣廣場。

原本諗住直搗黃龍，醒起呢度有幾間運動用品店，又去物色背囊，順便行埋一田。估唔到又真係睇到其中一個背囊嘅真身，經過今次我覺得買嘢真係唔易，行幾間先睇齊啲款。下一站去吉之島，估唔到居然冇火箭菜，明明之前我見到有，今次想買又冇嘅。買咗架上面最後一盒羅勒做後備，再返返過一田，嘔血，好彩一田有。一田做緊大減價，啲人多到啲嘢好似唔使錢咁，有啲得人驚，好彩自助付款好快。經過如心時去韓國貨店搵海帶，2 間都冇，唔通佢哋係同一個供應商？

終於都買齊晚餐嘅嘢，好重，終於都可以啟程返屋企。雖然揹住成噸嘢，都去咗轉超級市場買菜。我就唔覺得聽日會打風嘅，但岀個啲風吹到咁「恆」，都準備下啦。可能啲人仲未買餸，仲有好多菜，我揀咗擺得嘅椰菜同翠肉瓜。

返到屋企又執下嘢，煮埋晚餐，好攰 _(:_」∠)_。